མི་རྗེ་ཁྲི་འཛིན་གྱིས་ དབུས་ཕྱོགས་དང་ཤར་ཕྱོགས་རྫོང་ཁག་ཚུ་ནང་ གཞུང་འབྲེལ་དུ་ ལྟ་སྐོར་གནང་ནིའི་ལས་རིམ།
སྤྱི་ཚེས་ ༡༡/༠༩/༢༠༢༤ ལུ་ འབྲུག་གི་རྒྱལ་ཡོངས་ཚོགས་སྡེའི་མི་རྗེ་ཁྲི་འཛིན་གྱིས་ དབུས་ཕྱོགས་དང་ཤར་ཕྱོགས་རྫོང་ཁག་ཚུ་ནང་ གཞུང་འབྲེལ་དུ་ ལྟ་སྐོར་གནང་ནིའི་ལས་རིམ་འདི་ འགོ་བཙུགས་ཡོདཔ་ཨིན། ལྟ་སྐོར་ལས་རིམ་འདི་ཡང་ ཀྲོང་གསར་དང་བུམ་ཐང་རྫོང་ཁག་གཉིས་ནང་ རྒྱལ་ཡོངས་ཀྱི་ལས་འཆར་དང་ མི་དབང་མངའ་བདག་རིན་པོ་ཆེ་མཆོག་གི་བླ་ན་མེད་པའི་དབུ་ཁྲིད་བཟང་པོ་ཚུ་གི་སྐོར་ལས་ གསུང་གནང་ཡོདཔ་ཨིན།
འདི་བཟུམ་སྦེ་ མི་རྗེ་ཁྲི་འཛིན་གྱིས་ རྒྱལ་སྲུང་ལས་རིམ་དང་ དགེ་ལེགས་ཕུག་རང་སྐྱོང་ལུང་ཕྱོགས་ལས་འགུལ་ཚུ་རྩིས་ཏེ་ མི་དབང་མངའ་བདག་རིན་པོ་ཆེ་མཆོག་གི་ལས་རིམ་གལ་ཅན་ ལེ་ཤ་ཅིག་གི་སྐོར་ལས་གསུང་ཡོདཔ་དང་ དེ་ཡང་ རྒྱལ་ཁབ་དང་མ་འོངས་པའི་ན་གཞོན་ཚུ་ལུ་ ཡུན་བརྟན་གོང་འཕེལ་གྱི་དོན་ལུ་ གཙོ་བོར་བཏོན་གནང་ཡོདཔ་སྦེ་ གསུང་ཡོདཔ་ཨིན། དེ་མ་ཚད་ ལོ་ལྔའི་འཆར་གཞི་ ༡༣ པའི་དམིགས་ཡུལ་ཚུ་ཡང་གསུང་ཡོད་པའི་ཁར་ དགེ་ལེགས་ཕུག་རང་སྐྱོང་ལུང་ཕྱོགས་འདི་ རྒྱལ་ཁབ་ཀྱི་ཡུན་བརྟན་གོང་འཕེལ་གྱི་དོན་ལུ་ གཙོ་རིམ་ངོ་མ་གཅིག་ཨིནམ་སྦེ་ཡང་ གསུང་གནང་ཡོདཔ་ཨིན།
ད་རུང་ མི་རྗེ་ཁྲི་འཛིན་གྱིས་ རྒྱལ་ཁབ་ནང་གདོང་ལེན་བྱུང་ཡོད་མི་གལ་ཅན་གྱི་གནད་དོན་གཅིག་ འབྲུག་མི་ཚུ་ཕྱིའི་རྒྱལ་ཁབ་ཚུ་ནང་ ལཱ་གཡོག་འཚོལ་བར་འགྱོ་མི་འདི་ ཡར་སེང་འགྱོ་ཡོད་མིའི་སྐོར་ལས་ གསུང་ཡོད་ཨིན། དེ་ཡང་ མི་རློབས་མར་ཕབ་ཀྱི་ཉེན་ཁ་དང་ དཔལ་འབྱོར་གྱི་གདོང་ལེན་ཚུ་གི་སྐོར་ལས་ ཚ་གྱང་ཚུ་གསུང་ཡོདཔ་མ་ཚད་ འགོ་དཔོན་ཚུ་གིས་གནད་དོན་འདི་ དོན་སྨིན་ཅན་སྦེ་སེལ་ཐབས་ལུ་ ཐབས་བྱུས་ཚུ་བརྩམ་དགོཔ་སྦེ་ གསུང་ཡོདཔ་ཨིན།
དེ་མ་ཚད་ མི་རྗེ་ཁྲི་འཛིན་གྱིས་ རྒྱལ་ཡོངས་ཚོགས་སྡེའི་ཚོགས་ཆུང་ཁག་གི་ཕྱག་ལཱ་ཚུ་ གནང་བཞིན་ཡོད་མི་ཚུ་གི་སྐོར་ལས་ གསུང་ཡོདཔ་མ་ཚད་ ཁྲིམས་བཟོ་དང་བསྐྱར་ཞིབ་ཀྱི་འགན་ཁུར་ཚུ་ ཁག་ཆེ་བའི་སྐོར་ལས་ཡང་ གསུང་ཡོདཔ་ཨིན།
གཞན་ཡང་ མི་རྗེ་ཁྲི་འཛིན་གྱིས་ རྒྱལ་ཁབ་ཀྱི་དོན་ལུ་ མི་དབང་མངའ་བདག་རིན་པོ་ཆེ་མཆོག་གི་ ཐུགས་འདུན་དང་འཁྲིལ་ཏེ་ ཁྱད་རིག་གོང་འཕེལ་གྱི་དོན་ལུ་ ཁག་ཆེ་བའི་གཞི་རྩ་གཅིག་ཨིན་མི་ བརྒྱུད་འབྲེལ་དང་མཉམ་འབྲེལ་ དེ་ལས་ ཁས་བླངས་ཚུ་ཁག་ཆེཝ་སྦེ་ གསུང་ཡོདཔ་ཨིན། ད་རུང་ རྫོང་ཁག་ཚུ་ནང་ལས་ཕར་ ཞི་གཡོགཔ་དང་སྤྱི་གཡོགཔ་ག་ར་གིས་ རྩ་བ་གསུམ་ལུ་ ལྷག་བསམ་རྣམ་དག་གི་སྒོ་ལས་ཕྱག་ཞུ་མི་ལུ་ བཀྲིན་དགའ་ཚོར་ཚུ་ཕུལ་ཡོདཔ་ཨིན།
མི་རྗེ་ཁྲི་འཛིན་གྱིས་
འཕྲོ་མཐུད་དེ་ ད་རུང་ རྫོང་ཁག་ ༧ དང་ དྲུང་ཁག་ ༦ ནང་ ལྟ་སྐོར་གནང་སྟེ་ སྤྱི་ཚེས་
༢༢/༠༩/༢༠༢༤ ལུ་ མཇུག་བསྡུ་ནིའི་ལས་རིམ་འདུག
